رئيس التحرير: عادل صبري 04:22 مساءً | الأربعاء 24 أبريل 2019 م | 18 شعبان 1440 هـ | الـقـاهـره °

في 10 نقاط.. أسباب نجاح حملة «خليها تصدي» لمواجهة تجار السيارات

في 10 نقاط.. أسباب نجاح حملة «خليها تصدي» لمواجهة تجار السيارات

سوشيال ميديا

جمارك السيارات

في 10 نقاط.. أسباب نجاح حملة «خليها تصدي» لمواجهة تجار السيارات

محمد الوكيل 24 يناير 2019 12:40

سرد الرحالة المصري، أحمد حجاجوفيتش، 10 أسباب وراء نجاح حملة "خليها تصدي"، لمقاطعة شراء السيارات بسبب ارتفاع أسعارها، ولا سيما بعد تفعيل قرار خفض التعريفة الجمركية على السيارات أوروبية المنشأ.

 

"حجاجوفيتش" قال في تدوينة مطولة عبر صفحته الرسمية بموقع التواصل الاجتماعي "فيس بوك": "ملخص كدا مهم جداً وبسيط عن نتائج حملة خليها تصدي لغاية دلوقتي في ١٠ نقط"، وجاءت النقاط كالآتي:ــ

 

1ــ تقريبًا مفيش ولا عربية موديل ٢٠١٩ في الشارع.

 

2ـ مفيش لا بيع ولا شراء واللي بيشتروا حاليًا على مستوى مصر يتعدوا ع الإيد الواحدة ولا يمثلوا حتى ٥٪؜ من تارجت البيع لدى الوكلاء.

 

3ــ معارض العربيات بتنش بمعنى الكلمة وكل عروضها الناس مطنشاها، وده اللي مجننهم ومخليهم يعملوا تخفيضات بحجة وبدون حجة وصلت لـ ٤٠ ألف جنيه حتى في العربيات الكوري اللي مش في الاتفاقية أصلاً وبرده مفيش بيع ولا شراء.

 

4ــ الوكلاء يوميًا بيدفعوا أرضيات جمارك بالملايين وعندهم مصاريف موظفين وكهرباء وإيجارات معارض وقروض بنوك ومئات الآلاف من العربيات مركونة في الميناء.

 

5ــ غير المصيبة والكارثة الأكبر موديلات ٢٠٢٠ هتنزل بعد ٧ شهور وفي نفس الوقت كل موديلات ٢٠١٩ ومعظم موديلات ٢٠١٨ لسه متباعوش، وده اللي حيخلي الشركة الأم برة تسحب التوكيل من من الوكلاء هنا.

 

6ــ مراسلات كتير جدًا وصلت للشركات الأم برة عن مكاسب الوكلاء هنا الخيالية وده عامل مشاكل كبيرة لكل الوكلاء.. وحجاجوفيتش لما اتكلم مع شركات عربيات برة المسئولين هناك مش مصدقين المكاسب الخيالية اللي بيحققها الوكلاء في مصر، واللي بتصل في بعض الأحيان لأكتر من تمن العربية نفسها.

 

7ــ موضوع المقاطعة حاسس بيه الناس البسيطة العادية في الشارع و كمان الإعلام وده يعتبر نجاح للحملة، بس الانتصار الحقيقي بإذن الله بعد ٣ شهور أو لما تمن العربيات ينزل على الأقل من ٣٠٪؜ لـ٤٠٪؜ ..لأننا اللي عاوزينه لسه متحققش على أرض الواقع والتجار والوكلاء بيلعبوا معانا دلوقتي لعبة النفس الطويل وهما نفسهم في الحقيقة دلوقتي في العناية المركزة بس هما بيراهنوا على صبرنا، وغالبًا احنا الطرف الفائز.

 

8ــ ربك يمهل ولا يهمل، احنا شعب بسيط غلبان بنجري ليل ونهار على لقمة عيشنا وأحلامنا بسيطة، فمش هنخلي شوية حرامية بإذن الله يسرقونا عيني عينك بمنتهى البجاحة والفحش والجشع.

 

9ــ سؤال للتاجر.. أنا كشاب ببدأ حياتي وقررت اشتري عربية بسيطة،، ليه تسرق مني على الأقل ١٥٠ ألف غير ربحك؟ يعنى لو ربنا كارمني جامد أوي ومرتبي ٥ آلاف جنيه في الشهر، ف انت بتسرق مني على الأقل ٣ سنين كاملين من عمري لو مش حصرف ولا مليم في حياتي غير أقساط العربية.

 

10ــ الخلاصة.. الحملة ناجحة بكل المقاييس وسلاحها بسيط أوي وهو الصبر،، يارب نصمد كلنا للنهاية.

 

واختتم: "آخر نصيحة أوعى حد يشتري عربية دلوقتي.. لغاية ما نشوف ويبان رد فعل الوكلاء والتجار لأن فرق الفلوس انت أولى بيه أو ولادك".

وحرص عدد من رواد مواقع التواصل الاجتماعي، على مقاطعة شراء السيارات بسبب ارتفاع أسعارها، من وجهة نظرهم، ولا سيما بعد تفعيل قرار خفض التعريفة الجمركية على السيارات أوروبية المنشأ.

 

ودشن رواد موقع التدوين المصغر "تويتر" هاشتاج بعنوان "خليها تصدي.. زيرو جمارك"، مستهدفين من خلاله محاربة جشع بعض التجار وخفض أسعار السيارات.

 

وتفاعل عدد كبير من رواد السوشيال ميديا مع الهاشتاج، مطالبين الجميع بالتضامن معهم لمواجهة جشع بعض التجار، وسرقتهم للمواطنين – حسب وصفهم.

 

وقال محمد عاشور، أحمد مؤسسي الحملة، في تصريحات صحفية، إن الحملة مستمرة لمدة 3 شهور للضغط على تجار وأصحاب توكيلات لخفض الأسعار مقارنة بالأسعار العالمية، حتى تضطر المصانع العالمية لوقف التوريد لموديلات السنة الحالية، وهو ما سيؤدي إلى تراكم السيارات موديل 2019، وهذا ما تعكف عليه الحملة من الشعار الذي رفعته "خليها تصدي".

 

يذكر أنه خلال الشهر الجاري تم تفعيل قرار خفض التعريفة الجمركية على السيارات أوروبية المنشأ، لتصل إلى صفر جمارك، وفقاً لبنود اتفاقية الشراكة الأوروبية.

 

وكان عدد من الشركات والعلامات التجارية في السوق المحلي أعلنت منذ اليوم الأول لتفعيل الإعفاءات الجمركية على السيارات ذات المنشأ الأوروبي عن تخفيضات شملت نحو 170 طرازًا، وبقيم تراوحت بين 10 آلاف جنيه وتخطت حاجز المليوني جنيه.

  • تعليقات فيسبوك
  • اعلان